Protokol lékařské komise latinsky

Jesus Maria

Nos infrascripti Medicinæ Doctores, eiusdemque in Celeberrima Universitate Pragensi respective Professores publici, et inclyti Bohemiæ Regni Physici jurati, fidem facimus et testamur, Nos, et nobiscum infrascriptos Regni Bohemiæ Civitatisque Pragensis Chyrurgos ad instantiam Venerabilium Virginum Carmelitanarum ad S. Josephum in Parva Parte Urbis Pragensis, simul oculis vidisse et manibus contrectasse et diligentissime considerasse Corpus Venerabilis Matris Mariæ Electæ a Jesu, quondam Fundatricis dicti Monasterii, in sede collocatum, idque carne ubique solida, colore fusco seu castaneo, membrisque omnibus flexibilibus perfecte incorruptum, at liquorem quendam Iasmini odorem præseferentem distillans reperisse. Quam incorruptionem plane admirabilem omnes naturæ vires superare unanimiter censemus, propter sequentes potissimum rationes.

Primo, quia dicta Venerabilis Mater hydropisi et pulmonum apostemate extincta est, ut testatur Excellentissimus Dominus Nicolaus de Franchimont, qui ipsam infirmam aliquot annis curavit, necnon in extrema infirmitate astitit.

Secundo, quia corpus Venerabilis Matris non exenteratum in loco tam humido sepultum, ut post tres annos a Religiosis Virginibus extracta tumba non tantum inventa sit in quadam putrescentis aquæ lacuna consistere, sed et ipsa ad palmi altitudinem aqua simili repleta, vestesque putredine totaliter consumptæ, ut ex illis vix minimæ particulæ conservari possent, quin et ipse venter ex aqua tumidus appareret.

Tertio, quia post elevationem corpus multo tempore summis caloribus, auræ, solique expositum remansit, uti nos conspeximus, et testantur Venerabiles Virgines, quæ et sepulturæ et elevationi, cæterisque supradictis præsentes fuerunt.

In quorum fidem ad hoc specialiter requisiti præsentes literas manu propria subscripsimus, proprioque sigillo munivimus. Actum Pragæ die 12 Mensis Augusti. Anno 1677.

Zpět